content
De Torenman week 22 2009
't Is pikdonker in de toorn. Vlarden van de waarme lentedag `angen nog `ier en doar in de `ooken van 't vertrek. De Torenman is vrog in sien bedde `ekreupen en slap al een paer ure. Baaie is onrustig. De `ond lop van de ene kaant noar de aandere en lat van tied tot tied een licht gepiep `euren. 't Rommelt in de varte. Mopperend draei-jt de Torenman zich op sien aandere ziede. 't Bedde kraekt. De wiend trekt an en zorgt veur jaankende fluittonen om de toorn. Nog een keer draei-jt 't stokolde mannechien zich om onder sien juten deken. Een felle bliksemskicht verlocht deur de kieren in de deure ineensen `t vertrek en slat grote skaduwen van de inboodel op de waanden.
Hi-j zit meteen rechtop in sien kraekende bedde. De wiend fluit neet meer, moar giert en 't gerommel is neet van de locht. Dit bint neet de nei-je kanonnen van Blokziel, dit is `eel aandere kook. Disse weersomstaandig'eden doon `om denken an die vreselijke gebeurtenisse in 1558 toen de `ele spits van de toren waei-jde en hi-j nog net op tied `ad kunnen ontkoôm deur een verdieping laeger bi-j de klokken een veilige plekke te zeuken. Zo aarg kan 't nooit weer worden. Sien toorn is staarker dan toen. Bi-jnoa `onderd joar stoat de nei-je spits er now al weer op en `ef in die tied alles deurstoan. 't Olde mannechien mot denken an die keer dat mit storm en onweer de `aene van de toorn waei-jde en in de veurtuun van dominee de Roest terechte kwaamp. 't Kruus eronder bleef skeef boôm an de toorn `angen en mos laeter verwiederd worden.
Hi-j stek sien olielaampe h'an en trekt Baaie noar zich too. Hi-j docht 't veurige weke al: d'r komp gedonder.
De Torenman week 21 2009
De Torenman lop wat `en en weer om een beetien waarm te worden. Disse lente vaalt `t eigenlijk best wel mit mit de temperatuur, moar toch kan `t, veural in de vrogge morng', iezig kold wezen in de toorn. Hi-j `ef een pannechien waeter op'ezet en h'uut een op'erolde, recente h'oaflevering van 't Olde Wief wat braandnettelblaeties `aelt om die te gebruuken as theeblaeden. Beneden wordt de stad wakker.
Hi-j moppert bi-j 't lezen van de koppen in de verkreukelde kraante. "Blunder bi-j vakaansiepaark Skeerwolde". 't Wordt bi-jnoa gewoon. Sien B en W `ebben 't weer veur mekaander. Sinds de `erindeling is dat al de zoveulste keer. De mannen bint te klein veur zo'n grote gemeente. 't Sluusvrouwchien h'uut Blokziel `ad `om doar joaren `eleden al ies op `ewezen en 't was neet veur niks dat de Monnik h'uut 't Klooster in die tied kwoad weg'eleupen was van de eerste vergaedering. De Torenman `ad toen een poging `edön middels een bi-jeenkomst van verteung'woordigers h'uut alle kernen om wat een'eid te skeppen. De Punterman h'uut Gietern was de enige die nog een beetien mit `om mitgung; de rest was ontevreden en in verwarde toostaand noar `uus too `ekeerd.
Hi-j veurziet grote problemen veur sien stad en sien gemeente. Neet dat dat de eerste keer is. Hi-j `ef 't allemoale mit'emöken deur de eeuwen `enne. Zelfs `t `onderveertigjoarige Olde Wief is doar niks bi-j. D'r komp gedonder dat is zeker. Hi-j slurpt de `ete thee h'uut sien kroes en rolt een doevestrontballechien tussen sien kromme vingers. 't Is neet veur niks dat Blokziel al twee kanonnen `ef an'eskaft en er mit `ef proef'eskeuten, nee, er komp gedonder van!
Hi-j waggelt vanh'uut sien verblief de traans op en kek `eufdskuddend noar `t verkeer beneden dat zich langes 't nei-je Woldpoortplein wringt.
